Mege, bözi satu, aefa Gadi’a ba zekola eside (SD) lö aröu moroi ba nomora. Kalasi Önö Ga Di’a. Sindruhunia no alawa ndröfinia maifu, no felewitu fakhe, owalusö sa’e. Ba hiza börö sa’atö wa’omasinia sekola ba börö göi wa’ambö ndraono ba zekola sawena mufazökhi andrö, ba latema manö ia kalasi 4 me dua fakhe no.
Föna ö, no irai möi Ga Di’a ba zekola eside bö’ö. Börö wa’aröu – mato öfa kilo moroi ba nomora – ha irugi kalasi tölu ba iböhöli. Götö we’amöinia ba eside saröu andrö ba si lö ahono-hono tödö ndra satuania ero ma’ökhö. Na moteu sa’ae ba agasese awena mangawuli ga Di’a ba nomo ba na no arakhagö ogömi.
Me ibörögö ka Di’a ba kalasi sara ba oya nawönia fao, oya zamasura’ö töira ba eside andrö. Itugu ara ba itugu alö ndraono simöi, laröi manö börö ngawalö dahataha.
Afuriata hatö datö-datölu ndra ka Di’a zi fao-fao ba lala we’amöi ba eside andrö, irege kalasi tölu. Lö muzara-zara, ibato zekola ka Di’a, ha irugi kalasi tölu.
***
Ba mböröta ginötö Orde Baru ba lafasindro sambua eside ba mbanua ndra ka Di’a. Iraono sombato sekola no mege ifuli humulu dödö we’amöi ba zekola. Simanö göi ga Di’a. Me luo da’ö tenga taha-taha weamöi ba zekola ndröfi ndraono. Börö da’ö wa oya ndraono sizawa boto ba sebua döfi möi manö ba zekola. Ba ma’iki ita wamaigi-maigi … so zamake saraewa sanau, so zonganga afo, so göi zolohe balatu ba löwi-löwi.
***
‘Ya’ahowu Bapa …‘, i’owai guru kalasinia ka Di’a me irugi golayama nomo zekola andrö mege ba zihulöwongi.
‘Ya’ahowu …‘, da’ö wombale moroi khö guru Tane’a, guru sibohou tama moroi ba sekola guru siyawa ba Gunusitoli. No sigasiga, no rizerize, onekhe fabahasa. So nasa gonönöta: amahua fanikha mbunga. Tuka simesi göi na favoli. Na so guru Tane’a bakha ba danölafa voli, na favoli ia, ba laröi niha harimbale halöwöra, lafahatö ira ba danölafa voli ba wamaigi faramaena Guru Tane’a.
***
Ba ginötö wamahaö lö ahono Guru Tane’a, so möi furi so möi föna ba wamotokhi ba dödö ndraono zekolania famahaö andrö. La’omasi’ö ia iraono börö me onekhe ia mamahaö. Lö göi asese mofönu ia. Tenga simane Guru Takhöli sasese manafari iraono he ha börö wa’ahou fa’atohare ba zekola börö deu toho. Irugi samuza ma’ökhö laböbözi ia ba harimbale. I’oroi da’ö lö irai ihötui sa’ae sitou eside Muzöi guru Takhöli.
***
‘Negara apa di dunia ini yang ibu kotanya Lima?‘
Mulo-mulo lö gini-gini ba so na’i zi tokea ba wamondrongo fanofu andrö moroi khö Guru Tane’a. No iboho-boho guru Tane’a. La’ila da’ö iraono andrö labörötaigö wangöngösa.
‘Faya da’a khö Bapada le … hewisa so nogara si lima ngawua ibukota.‘
Irongo da’ö Guru Tane’a.
‘Ya’ugö zebua faya wö Dohu. Ebua moroi ba waya mbawi wayamö.‘
Mowa’igi ndraono bakha ba kelas wamondrongo fanema Guru Tane’a andrö khö ga Dohu.
No iboho-boho ka Di’a. I’ila wanema li, ba hiza alawö ia wanguma’ö. Khö ndra guru bö’ö, lö fa’alawönia, na i’ila ba i’anema’ö itema li.
Ba wamarou tödö ndraono, ihalö sara fena moroi ba nono mbarunia Guru Tane’a. Fena nifofa tawa, lö bohou sibai, ba hiza i no baga-baga. Ba ginötö da’ö ha ira guru, ba ha ira sohalöwö ba gödo zamake-make fena si manö, börö wa’amaha.
‘Yang bisa menjawab pertanyaan tadi, dia akan mendapat ini …,’ ifezawa dangania Guru Tane’a, tangania kabera sololohe fena andrö.
Labato waguaguasa iraono, lö nininini. Zara lafahasu ira.
Ifakhölö-khölö ia Guru Tane’a, i’ila wa so wa’edöna ga Di’a wanema li. Ifulöfulö dangania ka Di’a, ba lö ahono ia ba mbaku-baku, omasi ia ifezawa dangania ba wanema li. Ba lö alua.
Lö fakhamö ibeyawa dangania ka Di’a, no humede ga Di’u (Matius).
‘Bapak … ‘, humede ga Di’u ba i’amezawa’ö göi tangania.
Manimba dödö ga Di’a, ba simanö göi dödö Guru Tane’a. So waniasa khö ga Di’a ba wa’ahayania wanema li. Simanö göi Guru Tane’a.
Lö ara tö, findra sa’ae fena da’ö ba nono mbaru ga Di’u. Da’ö sa’e ni’era’era ga Di’a. Da’ö göi zi so bakha ba dödö guru Tane’a.
***
Föna-föna da’ö, no ha’uga kali inaö’ö wame’e fena andrö guru Tane’a khö ga Di’a. Ba lö isöndra lala. Lö tani (alasan). Da’a lalania si baga, si lö manofu dödö ndraono bö’ö: ibali’ö buala (hadiah) fena ba nonomurinia sangila manema li. Ba no itötöna wa ka Di’a zanema li andrö.
‘Alai ndra’o ndra’ugö ka Di’u, hana wamoharazaki sibai ndra’ugö … lö irai-rai khöu da’a ba zilalö …‘ da’ö wehede dödö Guru Tane’a. Lö i alua baehania.
‘Setahu saya setiap negara hanya memiliki satu ibu kota Pak‘, da’ö wanema li si kalua moroi ba mbawa ga Di’u.
Tenga mai wa’omuso dödö Guru Tane’a. Atulö niwa’ö ga Di’u ba hiza i, tenga fanema senahöi. Eluahania … so nasa ginötö khö ga Di’a wanema li.
‘Yaaaa … Di’a … apa jawabanmu?‘
‘Peru, Pak‘
‘Benar !‘
Itugu lö gini-gini bakha be kelas, terongo li walölöwa satoru. So zafusi bawa, so zanimba-nimba tödö, so zahele böböi.
***
‘No lafalemba ba mbagolö atlas dunia … ba lö khömi famaigi, lö na’i mileke’ö.’
Iduhugö sa’e wame menemene guru Tane’a ba ndraono nifahaönia andrö.
‘Terima kasih Pak‘, itema fena nifofa tawa ka Di’a moroi khö gurunia … tuhodödönia göi. Lö barani ga Di’a wamaigi bawa gurunia andrö.
***
Irugi yomo ka Di’a ba somuso sibai tödö ia. Isöndra fena nifofa tawa moroi khö guru omasiönia.
Ba zibongi, aefa manga ba aefa isasai wiga, galasi, awö mbowoa, barö wandru gasi nitawi barö lote khöra, ibokai mbukunia ka Di’a, ilau mombaso ba manura. Lö aratö ujian penghabisan … tama sa’e dania aefa ö.
‘Hana no baga baga fenau nogu. Hezo öhalö?‘, da’ö wehede fanofu si kalua moroi ba mbawa Nina Di’a khö nononia omasiö. I’ila wa tebai i’öli fena andrö ka Di’a, lö sagu khö nama Di’a wowöli da’ö.
Irongo da’ö Ama Di’a sanagu-nagu diala satöla khönia. Ifakhölö ia ba hulö zi falemba hörönia ba fena ga Di’a si takile-kile börö haga wandru gasi. Lö moloi hörö nama ga Di’a wamaigi.
‘Fena nisöndrau ia andrö ba nogu? Alai na fena gurumö satoru‘. Ifazaumba wehede fanekhegö Ina Di’a, he wa’ae no ihaogö wanguma’ö. Lö omasi ia na tetutu dödö ga Di’a ba wehede andrö.
‘Tenga fena satoru wö Na …!‘, ba ha irege da’ö wamotokhi ka Di’a, ifuli zui itohugö wanura.
‘Haniha zame khöu ba nogu …‘, itugu ombuyu weheda nina ga Di’a wanofu khö nononia. Fatua itema li ninania ka Dia no tohare Guru Tane’a.
“Yahowu Bapa !, Ya’ahowu Ibu !, imanö wangowai Guru Tane’a.
“Ya’ugö da’a i Guru … aine ! Dadao …,” ifazawa ia ama ga Di’a moroi ba nahania wanagu diala.
“He Di’a . fazökhi kofi ö ga’au .. öö.. bapau guru …”, fakaole wareta nama Ga Di’a wanguma’ö khö nononia. I’o-si-lö-mamendrongogö Guru Tane’a, telobi dödönia bakha, manimba dödö ga Di’a, owuawua dödö Nina Di’a.
Bongi ö, fao ira fadiala Nama Di’a guru Tane’a.
Lö ara furi ö, ha mato önö wawa me no aefa tama Gadi’a, terongo li garamba, terongo li waritia, labözi göndra, famaena zato, oi owuawua dödö ba wangowalu zi darua si tobali sambua. (e.halawa)
2 Responses to Ka Di’a ba Guru Tane’a