Da Tasuwö Dungö Corona

Thursday, April 16, 2020
By borokoa

Hadia duria solohe fa’ogömi
Si lö omasido urongo
Turia samanizinizi tödö
Turia sangombuyu boto

Ya’ia da’ö: turia dungö Corona
Tungö si möi mame’e famakao
Lö i’ombakha’ö me tohare ia
Idoro manö, lö hagohago

No sa’ae ato nibözinia
No sa’ae ato zi tekiko

Oi mogikhi mboto wa’ata’u
Oi mangelama, lö möi milo
Töra moroi ba nemali sanau gari
Tora ia moroi ba mbekhu soyo
Ibunu zi lö horö-horö
Itögi göi mbagi niha safaito

Itörö gödo famareta
Ilau ia ba nomo ndra razo
Lö i’andrö izi me itörö
Bawandruhö na’i lö itoko

Tara’u danga niha, no tobaya!
Tababaya mbawada, no togule!
Tahofo noho ba ngai zi bahö, no talo!

Alai ndra’o ndra’ugö Corona!
Corona tungö fa’erao!

***

Hadia hatö da’ö lualua mbakhu dödö?
Si tobali metumetu mbewe?

•••
Lö’ö le !
So wofo yawa mba’e
So dalu-dalu zowöhöwöhö
Ba so göi lala wamandröndröu Corona

Yai’a dani zi no tarongorongo
Si no la’ombakha’ö ira samatörö
Lala wangelama ba fangamoni’ö
Ena’ö tungö andre lö dumanö
Ena’ö Corona andrö lö itugu abö’a

Ya’e lala wametugö högö
Ya’e lala wanögi bagi
Dungö Corona sasiliyawa
Dungö si lö butu lö karua

Asese’ö wemondri ba manasa tanga
Tenga i simane mondri mitimiti
Tenga simane mondri mazauwu
Tenga göi ha togule zabu ba danga
Ma ha asala no abasö mbörö mbu
Arakö ndra’ugö maifu ba nidanö
Ő’fanoto uli geu wanoto ndra’i ba mboto
Sasai nukha, böi ragö ba mbotou

Taha dödöu wondra’u tanga niha
Fa ‘Ya’ahowu’ manö moroi ba zaröu
Lau laka sile ba zi fasaule ba lala
Na idoro lakania ba gambölö
Ba hole’ögö ba gabera
Ba na larafe ndra’ugö ba gotalua
Ba lau laka lari
Lau’a, taha manö

Na so dalu-dalu bulu ndru’u
Ma lahia, undre, bawa safusi
Samandröndröu fa’okafukafu
Ba sangabölö boto ba wolawa fökhö bö’ö
Ba sökhi na mufaliaro da’ö

Ba ginötö simane da’a
Abölö sökhi ni’omaomao
Ni’osimiki
Ni’o-si-lö-döla-döla
Böi taforoma’ö wa’ebolo haru-haru
Ba fa’ebolo dötö’a
Lö ata’u Corona ba da’ö

Moloi i Corona
Na ta’o’ö fefu wotu si fakhai ba da’ö

Heta göi khöu wanizinizi dödö
Aröu’ö wa’ogömigömi dödö
Böi döröhöwa
Böi hulö niha si lö Lowalangi ita
Si lö lemba-lemba dödö
Si lö baluse
Corona ha tungö
So Lowalangida sondrorogö


(E. Halawa, 11-04-2020)


Leave a Reply

Comment spam protected by SpamBam

Kalender Berita

April 2020
M T W T F S S
 12345
6789101112
13141516171819
20212223242526
27282930