Mege, bözi satu, aefa Gadi’a ba zekola eside (SD) lö aröu moroi ba nomora. Kalasi önö Ga Di’a. Sindruhunia no alawa ndröfinia maifu, no feleŵitu fakhe, owalusö sa’e. Ba hiza börö sa’atö ŵa’omasinia sekola ba börö göi ŵa’ambö ndraono ba zekola saŵena mufazökhi andrö, ba latema manö ia kalasi 4 me dua fakhe no.

Föna ö, no irai möi Ga Di’a ba zekola eside bö’ö. Börö ŵa’aröu – mato öfa kilo moroi ba nomora – ha irugi kalasi tölu ba iböhöli. Götö ŵe’amöinia ba eside saröu andrö ba si lö ahono-hono tödö ndra satuania ero ma’ökhö. Na moteu sa’ae ba agasese aŵena mangaŵuli Ga Di’a ba nomo ba na no arakhagö ogömi.

Me ibörögö ka Di’a ba kalasi sara ba oya naŵönia fao, oya zamsura’ö töira ba eside andrö. Itugu ara ba itugu alö ndraono simöi, laröi manö börö ngaŵalö dahataha.

Afuriata hatö datö-datölu ndra ka Di’a zi fao-fao ba lala ŵe’amöi ba eside andrö, irege kalasi tölu. Lö muzara-zara, ibato zekola Ka Di’a, ha irugi kalasi tölu.

***
Ba mböröta ginötö Orde Baru ba lafasindro sambua eside ba mbanua ndra Ka Di’a. Iraono sombato sekola no mege ifuli humulu dödö ŵe’amöi ba zekola. Simanö göi Ga Di’a. Me luo da’ö tenga taha-taha ŵeamöi ba zekola ndröfi ndraono. Börö da’ö ŵa oya ndraono sizawa boto ba sebua döfi möi manö ba zekola. Ba ma’iki ita ŵamaigi-maigi … so zamake saraewa sanau, so zonganga afo, so göi zolohe balatu ba löŵi-löŵi.

***
Ya’ahoŵu Bapa …‘, i’oŵai guru kalasinia Ka Di’a me irugi golayama nomo zekola andrö mege ba zihulöŵongi.

Ya’ahoŵu …‘, da’ö ŵombale moroi khö guru Tane’a, guru sibohou tama moroi ba sekola guru siyawa ba Gunusitoli. No sigasiga, no rizerize, onekhe fabahasa. So nasa gonönöta: amahua fanikha mbunga. Tuka simesi göi na favoli. Na so guru Tane’a bakha ba danölafa voli, na favoli ia, ba laröi niha harimbale halöwöra, lafahatö ira ba danö lafa voli ba ŵamaigi faramaena Guru Tane’a.

***
Ba ginötö ŵamahaö lö ahono Guru Tane’a, so möi furi so möi föna ba ŵamotokhi ba dödö ndraono zekolania ŵamahaö andrö. La’omasi’ö ia iraono börö me onekhe ia ŵamahaö. Lö göi asese mofönu ia. Tenga simane Guru Takhöli sasese manafari iraono he ha börö ŵa’ahou fa’atohare ba zekola börö deu toho. Irugi samuza ma’ökhö laböbözi ia ba harimbale. I’oroi da’ö lö irai ihötui sa’ae sitou eside Muzöi guru Takhöli.

***
Negara apa di dunia ini yang ibu kotanya Lima?

Mulo-mulo lö gini-gini ba so na’i zi tokea ba ŵamondrongo fanofu andrö moroi khö Guru Tane’a. No iboho-boho guru Tane’a. La’ila da’ö iraono andrö labörötaigö ŵangöngösa.

Faya da’a khö Bapada le … heŵisa so nögara si lima ngaŵua ibukota.

Irongo da’ö Guru Tane’a.

Ya’ugö zebua faya wö Dohu. Ebua moroi ba ŵaya mbawi ŵayamö.

Moŵa’igi ndraono bakha ba kelas ŵamondrongo fanema Guru Tane’a andrö khö ga Dohu.

No iboho-boho ka Di’a. I’ila ŵanema li ba hiza alawö ia ŵanguma’ö. Khö ndra guru bö’ö, lö fa’alawönia, na i’ila ba i’anema’ö itema li.

Ba ŵamarou tödö ndraono, ihalö sara fena moroi ba nono mbarunia Guru Tane’a. Fena nifofa tawa, lö bohou sibai, ba hiza i no baga-baga. Ba ginötö da’ö ha ira guru ba ha ira sohalöwö ba gödo zamake-make fena si manö, börö ŵa’amaha.

Yang bisa menjawab pertanyaan tadi, dia akan mendapat ini …,’ ifezaŵa dangania Guru Tane’a, tangania kabera sololohe fena andrö.

Labato ŵaguaguasa iraono, lö nininini. Zara lafahasu ira.

Ifakhölö-khölö ia Guru Tane’a, i’ila ŵa so ŵa’edöna ga Di’a ŵanema li. Ifulöfulö dangania ka Di’a, ba lö ahono ia ba mbaku-baku, omasi ia ifezawa dangania ba wanema li. Ba lö alua.

Lö fakhamö ibeyawa dangania ka Di’a no humede ga Di’u (Matius).

Bapak … ‘, humede ga Di’u ba i’amezawa’ö göi tangania.

Manimba dödö ga Di’a, ba simanö göi dödö Guru Tane’a. So waniasa khö ga Di’a ba ŵa’ahayania wanema li. Simanö göi Guru Tane’a.

Lö ara tö, findra sa’ae fena da’ö ba nono mbaru ga Di’u. Da’ö sa’e ni’era’era ga Di’a. Da’ö göi zi so bakha ba dödö guru Tane’a.

***
Föna-föna da’ö, no ha’uga kali inaö’ö ŵame’e fena andrö guru Tane’a khö ga Di’a. Ba lö isöndra lala. Lö tani (alasan).
Da’a lalania si baga, si lö manofu dödö ndraono bö’ö: ibali’ö buala (hadiah) fena ba nonomurinia sangila manema li. Ba no itötöna wa ka Di’a zanema li andrö.

Alai ndra’o ndra’ugö ka Di’u, hana wamoharazaki sibai ndra’ugö … lö ira’irai khöu da’a ba zilalö …‘ da’ö wehede dödö Guru Tane’a. Lö i alua baehania.

Setahu saya setiap negara hanya memiliki satu ibu kota Pak‘, da’ö wanema li si kalua moroi ba mbawa ga Di’u.

Tenga mai wa’omuso dödö Guru Tane’a. Atulö niwaö ga Di’u ba hiza tenga fanema senahöi. Eluahania … so nasa ginötö khö ga Di’a wanema li.

Yaaaa … Di’a … apa jawabanmu?

Peru, Pak

Benar !

Itugu lö gini-gini bakha be kelas, terongo li walölöwa satoru. So zafusi bawa, so zanimba-nimba tödö, so zahele böböi

***
No lafalemba ba mbagolö atlas dunia … ba lö khömi famaigi, lö na’i mileke’ö.’

Iduhugö sa’e wame menemene guru Tane’a ba ndraono nifahaönia andrö.

Terima kasih Pak‘, itema fena nifofa tawa ka Di’a moroi khö gurunia … tuhodödönia göi. Lö barani ga Di’a ŵamaigi baŵa gurunia andrö.

***
Irugi yomo ka Di’a ba somuso sibai tödö ia. Isöndra fena nifofa tawa moroi khö guru omasiönia.

Ba zibongi, aefa manga ba aefa isasai ŵiga, galasi, aŵö mboŵoa, barö ŵandru gasi nitawi barö lote khöra, ibokai mbukunia Ka Di’a, ilau mombaso ba manura. Lö aratö ujian penghabisan … tama sa’e dania aefa ö.

Hana no baga baga fenau nogu. Hezo öhalö?‘, da’ö ŵehede fanofu si kalua moroi ba mbaŵa Nina Di’a khö nononia omasiö. I’ila ŵa tebai i’öli fena andrö ka Di’a, lö sagu khö nama Di’a ŵoŵöli da’ö.

Irongo da’ö Ama Di’a sanagu-nagu diala satöla khönia. Ifakhölö ia ba hulö zi falemba hörönia ba fena ga Di’a si takile-kile börö haga ŵamdru gasi. Lö moloi hörö nama ga Di’a ŵamaigi.

Fena nisöndrau ia andrö ba nogu? Alai na fena gurumö satoru‘. Ifazaumba ŵehede fanekhegö Ina Di’a, he wa’ae no ihaogö ŵanguma’ö. Lö omasi ia na tetutu dödö ga Di’a ba ŵehede andrö.

Tenga fena satoru wö Na …!‘, ba ha irege da’ö wamotokhi ka Di’a, ifuli zui itohugö ŵanura.

Haniha zame khöu ba nogu …‘, itugu ombuyu weheda nina ga Di’a ŵanofu khö nononia. Fatua itema li ninania ka Dia no ŵai tohare Guru Tane’a.

Yahowu Bapa …, Ya’ahowu Ibu”, imanö ŵangowai Guru Tane’a.

Ya’ugö da’a i Guru … aine … dadao …”, ifazawa ia ama ga Di’a moroi ba nahania wanagu diala.

He Di’a . fazökhi kofi ö ga’au … ö bapau guru”, fakaole wareta nama Ga Di’a wangumaö khö nononia. I’o-si-lö-mamendrongogö Guru Tane’a, telobi dödönia bakha, manimba dödö ga Di’a, owuawua dödö Nina Di’a.

Bongi ö, fao ira fadiala Nama Di’a guru Tane’a.

Lö ara furi ö, ha mato önö ŵawa me no aefa tama Gadi’a, terongo li garamba, terongo li waritia, labözi göndra, famaena zato, oi owuawua dödö ba wangowalu zi darua si tobali sambua. (e.halawa)

Facebook Comments