Fangifi Nama Gõ’õ

Wednesday, September 29, 2010
By borokoa

E. Halawa

“He nogu, fazõkhi kofi õ namau talu, erege dõdõnia,” imanõ wanguma’õ Ama Dalaho khõ Gadi’a, ononia sawena tobali fagawe.

“He Ga’a, alai ndraugõ sa le, no tobali fagawe khõu Nono,” da’õ wamokai huohuo si’oroi mbawa Nama Gõ’õ me irugi nomo Nama Dalaho. Tatu manõ wa lõ olifu ia wondra’u tanga Nama Dalaho me awena irugi.

Lõ aboto lele afo, no tohare sambua galasi kofi moroi furi, kofi nifazõkhi Gadi’a, ono sibohou ebua sawena mõna ba teseti wanema fagawe. Dua turu wa’awe’ewe’e kofi moroi ba doyo galasi, ba dua turu wa’awe’ewe’e gulo yawa da’õ.

Lõ asese ilau da’a Ama Dalaho; ba hiza samuza da’a, no i’oroi’õ khõ Nina Gadi’a (Ina Dalaho) wangõhõna wowõli kofi, tesi, gulo, akua awõ gõi ngawalõ kue. Wa’oya dome si fao ba wa’omuso dõdõ ba fao ba wangandrõ salahi ena’õ itolo Lowalangi Gadi’a ba halõwõnia dania.

“Ae …, fa’amarase wõ khi, ni’auõ manõ wõ ia andre,” da’a wanema fangide’ide’õ moroi khõ Nama Dalaho. No ihaogõ ibini’õ wa’omuso dõdõnia, isõsõ manõ ba dõdõnia, lõ omasi ia i’oroma’õ khõ Nama Gõ’õ. Õrõna simanõ, ba oroma sa’atõ khõ Nama Gõ’õ moroi ba haga mbawa Nama Dalaho wa somuso tõdõ ba sowuawua tõdõ ia, he wa’ae iduhugõ wamini’õ.

“Hamega ya’i ba da’õ me tama khõu Gadi’a andre ba Gunusitoli, aefa da’õ ba mõi ia kulia ba Meda. Ba hamega ya’I ba da’õ me so zimõi mamaigi niha no. Eeee… simanõ wõ na harazaki …,” inõnõ wangombakha Ama Gõ’õ, hulõ abõlõ i’ila hikaya wa’auri Gadi’a moroi khõ Nama Dalaho.

No i’o simate Ama Dalaho, fagõna sibai ba dõdõnia hikaya Gadi’a salua ba mbawa Nama Gõ’õ.

“Ha’uga la’andrõ ira Bapada womasukõ ono andre ba halõwõ ?,” ifa’ese Ama Gõ’õ, omasi ia irongo samõsa moroi khõ Nama Dahalo gahakhõwania.

Hana ? Bõrõ so gõi khõnia ndraono, darua, si so nasa ba zekola. Lõ aratõ zia’a khõnia ba tama. Ba omasi sibai Nama Gõ’õ womasukõ sia’a tobali sohalõwõ ba famareta, tobali fagawe. Ba na tola na’i, ba he daru-darua manõ. Andrõ mõi ia wamalukhaisi Ama Dalaho, wanofu sibai ha’uga gahakhõwa Nama Dalaho.

“Lawa’õ wõ sa mege le 70, ba hulõ i tumbu wa’ahakhõ dõdõra ndra Bapa me ututunõ wa’amaresada. Andrõ la’alõsi. Ahori wa’i fefu 40,” imanõ Ama Dalaho.

“Õfa wulu ? Õfa wulu zuta ba ga’a ?”, tokea Nama Gõ’õ ba numero nitõtõi Nama Dalaho.

Ifahõkõ ia Ama Dalaho.

Lõ ara mangona Nama Gõ’õ khõ Nama Dalaho, ifuli ia ba nomo, ahele bõbõi no mbuyumbuyu timba zigõna simalapari. I’era’era, lõ ara tõ ba itõrõ zimane nitõrõ Nama Dalaho.

Harazaki, mangearõ Nina Gõ’õ, itimba danga ndrongania. Tokea Nama Gõ’õ, maoso ia, ibokai hõrõnia, ikete gulinia.

“Sangifi sa ndra’odo andre mege,” mohede Nama Gõ’õ khõnia samõsa.
Irongo Ina Gõ’õ, ibabaya mbawa ndrongania. Fakitõ bõbõi.

“Hana ndra’ugõ le?”

Lõ itema Ama Gõ’õ. Ifuli itõwui hõgõnia ambala. Ifuli mõrõ, omasi ia mangifi zui, fangifi bõ’õ, fangifi famarou dõdõ.***

3 Responses to “Fangifi Nama Gõ’õ”

  1. 1
    Same ere-era Says:

    Ha..ha..ha.., moi fama’ikida ba wombaso wangifi nama G6’6.

  2. 2
    iman sri lase Says:

    Ya’ahowu……..
    alai mano nono niha andre,ma’iki ita labe’e.tobali fondrara dododa,hewa’ae arou moroi ba danoda.
    terus tingkatkan ena’o ono niha lebih b’kembang n lebih terkenal goi.
    occccccccc!!!!!!!!!

  3. 3
    Peli Hal Says:

    haahhahhaha…. ya’imano. serius si’ai ndro’odo wo mbaso.. lucu,,,

Leave a Reply

Comment spam protected by SpamBam

Kalender Berita

September 2010
M T W T F S S
 12345
6789101112
13141516171819
20212223242526
27282930