Mangendröna Wolului ba Niha Bõ’õ
(Suka memberi pertolongan kepada orang lain)
he balugu, he tuha
lõ maulu na ha samõsa
he tuha he balugu
falali, zara falulu

ha zi lõ mamaigi talifusõ
ha zi lõ moleke makhelo
hulõ na isõlõ zibõlania
hulõ na lõ bõla zagõ baomo
ba lõ solului khõu na tofera’õ
lõ laleke na so khõu zikho
lafandrõndrõu ira na to’e’e’õ
la’erogõ’õ wozingozingo

andrõ wa noro dõdõ dalifusõ
andrõ wa noro dõdõ makhelo
tafaogõ ita, talului wataya
fao ita talului ta’onoro
manõ gõi na so khõda deu mbanua
itõrõ ita fozingozingo
fahulõ niwa we’amõi awõda
fahulõ wolului ba wonoro

na so ena’õ domosa dalifusõ
na so domosa si lõ na sawai
doro khõnia baewali zara nue
fasao atõ zara giti’iti
bõhõi ibe’e bõbõ dolodolo
he ha ibe’e bõbõ zandrari
famara’i galitõ na mõi milo
bõrõ galitõnia mõi ba gowi

na bõla mbawinia atõla haya
na bawinia no isika mba’o
ohe khõnia zambõmbõ darutaru
fasao wewe toli angi mba’o
sese’õ mbawi, fuli barõ gõli
õfataboi wamuli ba mba’o
akha iraononia ndrabe ba haya
akha la’angi wanõlõ ba’o

ma so khõnia zamaukhu lõ sosou’a
ma solawayõ, lõ naha gadulo
wa’õ ndraonou wolohe segasega
akha ndrambe khõnia barõ nomo

na fakhamõ bõbõ khõnia ba ndriwa
ngaigõ khõnia ba mbõrõ gehomo
ibe’e ba da’õ khõnia zamaukhu
ma solawayõ, mõi mangadulo

ba bõi andrõ luou ba wolului
akha hulõ manõ lõ terongo
ba mamahowu khõmõ Lowalangi
mamahowu khõu Zombõi sato

Ifahowu’õ wangahangahalõ
Ifahowu’õ wangehangehao
mongafu khõu ndraono satuatua
mongafu khõu ndraono sehaohao

zi oi ono fangali mbõrõsisi
zi oi fangali mbu’ukawono
oi ira ono omasiõ zihõnõ
ahori ono omasiõ zato

andrõ folului ba nawõ bõi bõhõli
folului ba nawõ bõi bato
me ororisa Zihai Uwu zi hõnõ
me oroisa Zihai Uwu zato

moroi ba mbuku:
Hoho, Manõmanõ Nono Niha
So’atumbukha moroi ba Pancasila –
nifa’anõ S.W. Mendrõfa (A. Rozaman)