Elemu: Solohe ba Wa’atekiko (2)

Thursday, March 8, 2007
By nias

Tandra-tandra Niha So’elemu

Börö me so ba gotaluada zo’elemu, ba tatu manö wa itataria fariawö ita khöra. Fa’aso gelemu andrö ba mbotora ba ba gera’erara tola isausi niha bö’ö si fariawö khöra: talifusöra, awöra ba lala, si falukha khöra ba harimbale, ba tanö bö’ö. Börö me tola isausi ita elemu andrö sitaro ba zi samö-samösa niha, moguna ta’ila lala hewisa wangeheta ma ba wamandröndröu ya’ita moroi ba pöngaru (pengaruh) gelemu andrö.

Si’oföna sibai, moguna ta’ila hewisa dandra-tandra zo’elemu andrö. Molo’ö famaresoma, ya’e dandra-tandra niha so’elemu andrö, soroma ba höröda na fatua musugi gelemunia andrö:

  1. Mofanifanikha mbawa (lawa’ö ba khöda mosahasahayo), awuyuwuyu wamaigida, lö oroma wa’atua, lö oroma wa’afuo.
  2. Itugu ebua ba itugu alawa mbotonia wangilada, linia itugu esolo. Fao ba da’ö, itugu molakhömi ba totaö ia ba hörö ba ba dödö niha, mendrua manö ba zawena, ma ba zi lö asese falukha khönia.
  3. Barani sibai, lö fa’ata’u, he ba gotalua niha sato, ba he ba gotalua musu ma ba gotalua ndra segebua (pembesar). Ba gotalua niha sato, itugu onekhe-nekhe ia wahuhuosa, ba itugu omasi niha (si lö nasa anehe sibai khönia) wangangö ngainia.
  4. Na fatua maoso gelemu andrö khönia, ba tola mate ita wa’igi ba wamondrongo huhuo ma hikaya nitutunönia, börö me lucu sibai tawa’ö.
  5. Omasi sibai niha fahuhuo khönia ma ba wangagö ngainia. Alulu ba ahele sibai dödöda wame’e angandröwania, he kefe ba he tolo-tolo bö’ö.
  6. Itataria ba zi lö tadönadöna, ba lö göi i’angenanöi, i’ombakha’ö ba gotalua zato rahasiania, rahasia ngambatönia, ma rahasia nawönia, si tebai mena’ö la’ila ma larongo niha sato.
  7. Na tahaogö taligi, ba oroma khöda wa fangi’ilada niha so’elemu andrö tebulö-bulö (berubah-ubah). Ba ginötö wemaoso gelemunia andrö, ba oroma khöda zimane nisura ba ngawua si (1) irugi (6) andrö yawa. Ba ginötö bö’ö, ba fabö’ö zui wangi’ilada ya’ia. Hezo ginötö bö’ö andrö ? Na aefa sibai maoso ia, na lö sogadu-gadu ya’ia, na no mudaodao ia ha ya’iya’ia, ma na fatua i’ohalöwögöi halöwönia ha ya’iya’ia. Simanö göi na fatua itörö lala ha ya’ia, lö sihede khönia, na no i’erogö ita ma lö i’ila’ila ita. Ba ginötö simanö, tebulö wamaigida botonia: afuo, lö moamoadu, tekafo mbo’ö, ide’ide ma ise’ise mbotonia, lö lakhölakhömi, no ise-ise li na muhede.
  8. Itataria, ba zi lö tadönadöna, isaka dödö niha fehedenia. Dumadumania tola manö iwa’ö khöda: “Niha si lö karua ndra’ugö andrö ..”. Lö i’ila zafökhö ba nawönia, iwa’ö-wa’ö manö.
  9. Asese sibai si tokea ita niwa’ö ma nifaluania. Hadia niwa’önia ma’ökhö olifu ia mahemolu da’ö.
  10. Na tahaogö taligi (perhatikan dengan seksama) ba oroma khöda wa asese tenga sindruhu zalua baehania, asese ifakhai manö dalu waya ba huhuonia. Andrö dania asese afatö dödöda nilau ma nitutunönia.
  11. Si fakhai ba ngawua (10) andrö, lö göi ada’uda’u ia wanötöi töi Lowalangi ma fahölusa ena’ö faduhu dödö niha khönia ba dalu waya nitutunönia andrö. Börö wa’onekhe-nekhenia wehede, agalio sibai faduhu dödöda niwa’önia, he wa’ae faya. Da’a zui dania mbörö wa asese kecewa ita ba niha simanö.
  12. Wa’abe’e högö (keras kepala), lö manö fa’itema tödönia menemene ma bua gera’era si sökhi moroi ba nawönia. Nönö da’ö, asese na’i iwalinga si fatiu khönia ma solulugö ya’ia ba mbaho, niha same’e era’era si sökhi khönia. Börö da’ö asese lalulu manö sa’ae ia niha sahatö khönia, börö me lö irai itema mbua gera’erara si sökhi nibe’era khönia.
  13. Na fahuhuo ia föna zato simane na inötö kampanye ma ba gowuloa bö’ö soya niha, ba mo’ali’alitö, agasöla ba agatarö sibai linia. Niha si lö mangila ya’ia, ahölihöli sibai dödöra niwa’önia andrö. Ba niha si no mangila, ba fefu niwa’önia andrö ba lö azi’azi.
  14. Itataria ifaehagö gera’era ma ifalua halöwö si lö masu-masu ba aka nawönia niha, si tobali fama’igi niha ba gafuriata.
  15. Lö aiwö-aiwö ia wamatunö ba ba wanuno fa’onekhenia, fo’okhötania, fa’abölö mbotonia, awö keberhasilan-nia bö’ö, irege mane na laduhö dögi dalingara niha samondrongo.
  16. Itataria ihulö li Lowalangi. Duma-duma tola iwa’ö: “Lö tola lö alua halöwö andre, no alua khögu dandra …. ” , ma zui: “Ha Lowalangi zi tola manenawa ya’o …”, ba tanö bö’ö na.
  17. Na fatua maoso gelemu andrö, linia molakhömi sibai, ebua, ba abakha, ba tola möi fameta’u ma famanizi nudunia. Na si fahuhuo föna zato ia, ba lö ginigini niha wamondrongo, he wa’ae lö ösi’ösi huhuo andrö.
  18. Ambö omasi ia na so niha sabölö moharazaki, sabölö onekhe, ma sabölö tehöngö moroi khönia. Na so niha samatunö khönia simanö, ba lö aiwö-aiwö ia wangeherai niha da’ö, ba ma zui ilau manö mofanö, ba ma zui i’o-si-lö-mamondrongo.
  19. Wa’omasinia wangeherai emaliania föna zato, lö omasi ia i’alui lala ba wolohe ba zi sökhi gotaluara andrö.
  20. Na so gotaluania ba niha, ba abua sibai khönia wangeheta fahö’ösa ma dendam moroi ba dödönia, lö omasi ia wolohe ba zi sökhi.

Tandra-tandra ma ila’ila si dua wulu nisura andrö yawa ba lö fefu so ba zi samösamösa niha so’elemu. Tandra sabölö oroma, ba ya’ia da’ö fa’atebulöbulö wangi’ilada botonia, simane nisura ba ngawua si (7) andrö yawa. (eh)

2 Responses to “Elemu: Solohe ba Wa’atekiko (2)”

  1. 1
    Halilintar Says:

    defi 80 an, bafasa G. Sitoli so sitobali hongo hongo yaiya da o ” farema ” g. Sitoli lafotoi ira KOMBELA ( Komplotan Bechu Laja ) na larongo toi dao bano ata u ita, sebenarnya yaira andro lo muelemu hanya mencari jati diri bahwa ono niha sabee rango rango , eluaha nia bafasa G Sitoli ato niha mbata sametau ono niha dan solimo ono niha siotarai mbanua ba hari Foke ( Harimbale ) waktu dao namun meso KOMBELA ( Identik elemu ) yang mencari jadi diri bahwa hal dao tebai terjadi cho ono niha sehingga Kombela bergerak untuk mengatasi farema siotarai Siefo supaya niha mbata lo semena mena cho ono niha ” Sabee rango rango ” artinya tenga elemu. Yaahowu

  2. 2
    Ono Niha Zebua Says:

    Sindruhu da’o amagu balugu,

    Awai’i lofefu niha sino o’sura yawa 1 ofeta 20 andro sokhora elemu.
    Samosa yao khala-khala simane da’o baso khogu, batenga boro meso gelemugu.
    Hadia fagolo ira “fetua” faoma “elemu” ? Boro sogoi zangumao yawa fetua moroi ba elemu.

    Tapi natola onono nasa : waniha so elemu naero rafe asese oforo-foro duru ahe nia, ena’o larongo linia ma lago’o niwa’o nia.
    Zifaudu bada’o mena’o tafotoi ia dandra-tandra niha so afokha.

    Hulo zimano amagu balugu… ya’ahowu

Leave a Reply

Comment spam protected by SpamBam

Kalender Berita