Ba maoso zui Zihai Uwu Nangi
ba maoso zui Zihai Uwu Mbara
Ifuli ifagia nuwu nangi
ifuli ifagia nuwu mbara
Ifagia nangi si hulö nadu nuwu
ifagia nangi si hulö zinela

Ba me faondra nangi mowazuzu
me faondra nangi mowalukha
ba terongo li si hulö zigu
alua li si hulö lagia

Ba so lölöu döla hulu nangi
Ba so lölöu döla hulu mbara
Motuho da’ö me mo’ösi
motuho ia moledawa

Ihalö da’ö Sihai Uwu Nangi
Ihalö da’ö Sihai Uwu Mbara
Nihalönia sambua laharö
Nihalönia sambua hita

Itanögö ba mbulu newali
Ihayaigö ba golayama
Ibe’e lölönia nga’ukhu muko
ilölö bagi zotöra

Yawa ba danö nihaehae nangi
Yawa ba danö nihaehae mbara
Idada wa’ania sorumi muko
Idada wa’ania sorumi nukha

Ba lö ahou si’ai lö mowongi
Ba lö ahou si’ai lö mogasa
Ba alua dalinga solöndru mbogo
alua dalinga sofalölöwa

Iwalö alua lehe sohulayo
alua lehe sotawöwanikha
Alua göi mbulu sangewolo
tedou mbulu humara’a

Tedou döla alawa mangesolo
ambö hörö ibaya mbanua

Ba maoso zui Zihai Uwu Nangi
maoso yawa Zihai Uwu Mbara
Ifatörö döi famaduhu’ö
Ifatörö döi ogaonita
Ibe’e töinia Dora’a Tora’i
da’ö döinia Tora’a mbawa

Ba lö zui möi zahou lö mowongi
Ba lö zui möi zahou lö mogasa
Mo’ulu’ulu da’ö mobowo
Mo’ulu’ulu da’ö mogaya
Alua ba mbute döla madulai
Alua ba madulai bute döla

Ba lö na’i fakhamö wonehesi
ba lö na fakhamö wangofaya
Ba aboto zigaru ba hogu
teboka gomböita mbua

Aboto mbowo songamohi
atoru tou i’osisi döla
Atoru tou ba mbörö lali
mangahono ba waremoa wa’a

Ba maoso zui Zihai Uwu Nangi
ba maoso zui Zihai Uwu Mbara
Ihalö da’ö i’a’azökhi
ihalö da’ö ifoduma
Iwöwöi ifonga’eu
Iwöwöi i’onihaniha

Ba moboto ia ba monga’eu
monga’eu mane niha
Ba no i ombuyumbuyu lö monoso
no oledaleda lö motöla

Awena ifa’aso Mbaliu börö danömö
ifa’aso Mbaliu uwu niha
Da’ö Mbaliu sibaya tahö nuwu
da’ö mbaliu sokhö me sibaya

Da’ö zame noso ba dögi nikhu
iwuwusi zinata mbawa
Ibe’e noso si sambua fondruyu
ihehaini zi fulu saga

Awena mamukhö niha mangawe’e
awena maliwa motöla
Oi so ndrotondroto fonga’eu
oi so galakhaö tanö bakha

Ba lö i wo’atö dekhe dödö
ba lö mula’a mbo lö musua

Awena yawa Zihai Uwu Nangi
Awena yawa Zihai Uwu Mbara
Ifa’aso Laelu uwu dödö
ifaöndru Laleu si ungoi söndra
Da’ö zola’a tödö samo’atö
isua dödö ifo’era’era

Awena motödö niha hulö Laelu
so gera’era fa’odoma
Awena ilau faego famanömanö
awena humede fademadema

Ba maoso zui Zihai Uwu Nangi
ba maoso zui Zihai Uwu Mbara
Ifatörö döi “onomatua”
ifotöi ia mosilaöwa
Töinia “Tuha Sangehangehao”
da’ö wö “Duha Sangaewangaewa”

Ba maoso zui Zihai Uwu Nangi
ba maoso zui Zihai Uwu Mbara
Ifa’aso niha baulu nidanö
ifa’aso niha baulu Zea
Ibe ba danga zi siwa motöi
ibe ba danga zi siwa göla

He ulidanö ma’asagörö
he ölia ma’asambua
Ba fefu mömö, wewe awö ndru’u
ba fefu geu ba gatua
Fao gi’a nidanö awö nasi
awö wofo dalumbanua
Idanö fao nasi bawa nadu
fao galitö saukhu sihola
Oi amatöröwa ni’okhögö
oi okhöta oi aya niha

Me niha khönia Zalahi nga’eu
me ibe niha salahi döla
ba wamatörö ulidanö
wango’ayagö ölia

ena’ö tobali ele’ele dödö
fanuariagö wa’asalawa
Enaö ladunödunö ba ma’uwu
enaö la’oroi’ö ba madora

Ba lö zui möi zara, lö möi zahou
ahou zamö’i ara wemeha
Mo’ulu’ulu zui Dora’a Tora’i
mobowo zui mo’omböita mbua

Ba lö saboto nafo ba wamole
ba lö asoso gö gasagasa
Ba aboto zigaru ba hogu
asila zigaru döla

Aboto lohulohu mbowo
humara’a gomböita mbua
Atoru tou isawa mbörö
aekhu i’osisi döla
mangahono ba mbörö lali
i’agö waremoa wa’a

Ba maoso zui Zihai Uwu Nangi
maoso zui Zihai Uwu Mbara
Ihalö da’ö me iwöwöi
ifoduma tobali niha
Ifonga’eu mane buruti
Ibe nga’eu zita’unga
Ibe töinia “ira’alawe”
böröta zibolowua

Ifatörö döi wanitiniti
Ibe’e döi ogaonita
Buruti Sangazöngazökhi
Buruti So’ungoi Ngaoma

******
Ba maoso zui Zihai Uwu Nangi
maoso zui Zihai Uwu Mbara
I’ohe khö zia’a ba womböi
idoro khö ziföföna wolata
khö Duha Sangehangehao
khö Duha Sangaewangaewa

Ibe’e dongania tambai nga’eu
ibe’e dongania tambai döla
Samaföfö khönia samasahe
samatohu fangerangera

Silului manoto na esolo
samasila göi na ebua
samaföfö na enau
samahea na abua

******
Ba me i’ila Tuha Sangehangehao
me i’ila Tuha Sangaewamgaewa
omuso dödö barö doto
omuso dödö barö dötö’a
ma’iki oi alulu mbo’ö
ma’iki iboho mbawa

Ibe töinia galawe huno dödö
Ina Sa’ötö Wangerangera

Itema ia me i’orua mbö’ötö
itema ia me i’orua danga
Tobali dongania tambai nga’eu
tobali dongania tambai döla
Tobali awö ba wofanö
donga si falulu manga

Lö faehu geraera dödö
lö faute ba angofaya
Endronga mbeka ba wofanö
na molombase fa taisa

Zara fa tabu ba wohalöwö
lafa’usu dalu lahina
Faoma lö fawini tödö
faoma fawolo era’era

Oi alege dödö manudanö
fa alai khöra gogowaya
La’olayagö ira uro fusi
oi molau maena khöra welawela

A’oi zara fatödö nono laosi
Fa oi ya’ia khöra nono zökha
Me ha sarasara khöra dödö
me ha sambua khöra gera’era

Ba omuso dödö Zihai Uwu Nangi
Omuso dödö Zihai Uwu Mbara
Ba wamaigi si no iwöwöi
wangila si no ifoduma

Andrö ibe’e khöra howuhowu
inönönönö wame okhöta
Lö lataha labasi mbua nowi
liwua gurifö afönu haya

Boto tedou abölö mosandari
töla tugu abe’e moköla
Era’erara motödö Laelu
tedou wa’odödö fa’odoma

Lö rai mowakara börö nafo
lö fabötu börö lahina
Norora lafaföfö na enau
ba faoma lafahea na abua

Noro sabua lalului waoso
saoha lafalali danga
Faoma falugö na möi mörö
na maoso faoma wezawa

Tenga faronga ha ba mbolo dufo
faronga dödö fao gera’era
Ba tumbutumbu khöra dohu nga’ötö
ono alawe ono matua

Sumber: Fondrakö Ono Niha – Agama Purba – Hukum Adat Mitologi – Hikayat Masyarakat Nias” karangan S.W. Mendröfa (A. Rozaman), hal. 35 – 39.

Facebook Comments