Pengantar Redaksi: Milis Li Niha yang beberapa waktu lalu dibuka oleh Yustinus Waruwu telah aktif mendiskusikan berbagai hal tentang Li Niha. Salah satu hasil kecil dari milis tersebut adalah ‘turia’ berikut, yang di-li-niha-kan oleh E. Halawa & Antonius Gea. Anda berminat ? Bergabunglah dalam Milis Li Niha.Fangosara era’era sanandrösa ba hada (Fondrakö) andrö ba ebua sibai geluahania ba Nono Niha. Inötö wangosara andrö no inötö si sökhi ba wanganau’ö ölö hada Nono Niha, börö me Fondrakö andrö no sambua tandra ma tuho wa’a’ononiha, si tebai taya.

Simanö niwa’ö Bufati Nias, Binahati Baeha SH, me ibokai rafe Hada-Fondrakö Nono Niha, si fao famalua owasa awö wama’ele ngawalö hada si so ba zi sambua köcamata Gunungsitoli, nifalua ba Gödo Cama Gunungsitoli, Jalan Pancasila Gunungstioli, Sinaya, 6 mbawa Sifelezara.

Molo’ö Bufati, budaya andrö ba no si tobali lambang ma ila-ila zi sambu-sambua banua soroma moroi ba mbuabua sero ma’ökhö.

Börö da’ö, moroi ba rafe Hada-Fondrakö nifalua ba zi dozi köcamata dania, itötöna Bufati wa so wa’atedou wangi’ila ba fondrorogö ngawalö hada Danö Niha, si tobali harato Nono Niha, okhöta sebua.

Famalua rafe Hada-Fondrakö siföföna andre ba Danö Niha no fatema sibai ba dödö wamareta Daerah Kabupaten Nias, börö me no sambua lala ia ba wondrorogö ba ba wanganau’ö ölö hada zatua föna.

Fakhai ba da’ö, iwa’ö Bufati, ba ndröfi 2007 dania famaha’ö si fakhai ba Hada Nono Niha tefa’ema ba zi dozi sikola si so ba Kabupaten Nias. Da’a no sambua tandra wefao ba halöwö fondrorogö Hada Nono Niha.

Fehede si fagölö ba da’ö ifa’ema göi Armansyah Harefa, agota DPRD Kabupaten Nias, Dapem Gunungsitoli. Itema fao fa’asökhi dödö wamalua rafe Hada-Fondrakö ba Köcamata Gunungitoli, samatumbu’ö fa’omasi wondrorogö hada zatua föna, töra-töra ba dödö ndraono sibohou ebua, si so ba Kabupaten Nias.

Na tatuwu huku hada khöda, ba tola te’aröu’ö ita moroi ba ngawalö wa’udusa, sökhi mbarahao, ba aröu zi tobali faguaguasa. Simanö niwaö Yanueli Nazara, Cama Gunungsitoli. Simane si no anehe ita sa’ae, ba ginötö iada’a, alio sibai wa’atewua gera’era awö wa’atewu’a niha moroi ba zi sambua tanö numalö ba danö tanö bö’ö, si tebai mubatogö. Ba zalua simanö, no oya ngawalö hada si no ibörögö te’olifugö, ba bua-bua si sökhi si faudu ba hada Nono Niha no oya i’angali’ö bua-bua hada si fabö’ö, si tohare moroi ba danö tanö bö’ö, nidönia’ö zotöi “golobalisasi” .

Aefa da’ö, oya ndraono si bohou ebua si lö (ma sambö) mangi’ila huku hada zatua föna, töra-töra ba Gunungsitoli, Ina Mbanua Kabufate Nias, fahandrona ngawalö gana niha si fabö’ö-bö’ö hada.

Itötöna Cama ena’ö fefu zi fao ba rafe andrö labe’e gera’era ma söndrara, ena’ö tola tetanö bakha ba mbuku fefu ngawalö zi fakhai ba huku hada Laraga andrö si so ba Gunungsitoli. Da’a fefu moguna dania si tobali baka-baka ba wefao ba sömina (seminar) hada nifalua Lembaga Budaya Nias (LBN) Kabupaten Nias.

Föna ö, i’ombakha’ö TN Zebua, Kötua Timi Wamalua Rafe andrö, wa rafe fangosara andrö tefalua ba zi dua ngaluo fa’ara. Öfawulu niha zi fao ba rafe andrö, oi ira salawa hada ba ira satua mbanua moroi ba zi ero’ero banua ba Köcamata Gunungsitoli.

Famalua rafe andrö labörögö (labokai) faoma Fangowai ba Fame Afo, awö mai-mai ba sinunö Nono Niha, ni’ohe gorahua budaya “Bola Lahina Gunungsitoli”.

*Nihalö moroi ba Analisa Online “Bupati Nias Buka Musyawarah Adat Fondrakö”, 9/11/2006, ni’ali E. Halawa ba Anton Gea.

Facebook Comments