Famahaö Moroi ba Hoho Nono Niha

Friday, November 3, 2006
By nias

Famasao: Sindruhu wa niha sanau fangera-ngera, si sökhi hada ba si sökhi böwö ndra satuada föna; oroma moroi ba hoho niröira khöda. Hadia so göi zi toröi ba mbuabuada fa’asökhira ? Khöda wangerangera. Hoho nisura andre tou tehalö ia moroi ba mbuku: Hoho, Manömanö Nono Niha So’atumbukha moroi ba Pancasila – nifa’anö S.W. Mendröfa (A. Rozaman)

MUSIA’AIGÖ WAWOLOSA WANGA’I ANGETULA, SOTENDROMA BA MBARAHAO

(mengutamakan musyawarah dalam mengambil keputusan untuk kepentingan bersama)na tödöda wangazöngazökhi
na ohitöda wangehangehao
he na ba gorahua ba nöri
he na ba gorahua zato
ba nisia’aigö wafulita
nisia’aigö fawolo
khö nawöda ba gorahua
ba khö ndra Tuha Terongo
hezo nihuhugö liwua
hezo zi fao dödö zato
da’ö zindruhu gangetula
dozi tatuwu fa aro
oroisa ba ndraono mifuri
sinöngöni ndraono satoso wö ae zöndra zi ha samösa
so wö ae zöndra sambua boto
ba hulö i niwa’ö ba umanö
hulö niwa’ö ba hoho
sondröni silalöyawa gosali
sondröni silalöyawa nomo
me idöni lö si fao zi hönö
me idöni lö si fao zato
lö tegilo zi sadanga tanö
lö na’i tebua zi salito
za’oila zaekhu danga niha soya
za’oila na aekhu niha sato
ha faikö ofeta baolayama
ha faikö ofeta baulu zebolo

ue ndrali ba mbö’ö
khö Duha Balugu Gözö
Sambua sagötö ndralimö
dali fanikha idanö
famao dödö dalifusö
famaogö zi sambua tanö
na oi fa dali, oi fa be
falugö zara falagae
lö hili si tebai sumösö
lö noro tebai mu’ohe

MUSIA’AIGÖ DENDROMA MBARAHAO
(mengutamakan kepentingan umum)

lö fahuwudo ba zigölu
lö fabelado ba mbogo
me ha önia i’era’era
ha talunia ifo’ungo

lö fabelado göi ba mböhö
lö fahuwudo ba laoyo
nahiania dalu gatua
förömania nuwu mbaho

tanehegö laengawa döwu
da tanehegö lawoha
lö irai ira fatötöi
lö irai ira fakara
lö khöra si fakhögukhögu
lö khöra si fakhönia
oi si fahulö wangazöngazökhi
oi si faliolio wamoduma
oi lasia’aigö wangorahu
ba zuzu labe wa ha sambua
maedo khöda ba wohalöwö
maedo da’ö khöda ba domosa

hogu geu tarewe nangi
e nidanöfaekhu tare
mana na gi ba lafaogö li
mana na go ba lafao hago

aya’aya ndra Si’ulu
aya nono zalawa
wamao rozi na fakhumi
fangadölö zi fawuka

2 Responses to “Famahaö Moroi ba Hoho Nono Niha”

  1. 1
    Arifman Sarumaha Says:

    bagus sekali pepatah nias ini, membuat saya tertarik untk menghafalnya.

  2. 2
    Arnazz Dachy PutNisel Says:

    Mntaappp, jadi kangen ma Niaky

Leave a Reply

Comment spam protected by SpamBam

Kalender Berita

November 2006
M T W T F S S
 12345
6789101112
13141516171819
20212223242526
27282930